काठमाडौँ – दीक्षान्त पुस्तक प्रकाशन कीर्तिपुरले धादिङस्थित एउटा विद्यालयलाई डेढलाख भन्दा बढी मूल्य बराबरका पुस्तक हस्तान्तरण गरेको छ ।
१४ औँ पुस्तकालय दिवसको अवसरमा प्रकाशनले धादिङ धुनीवेशी ५ मा रहेको महादेवस्थान माध्यमिक विद्यालयलाई पुस्तक हस्तान्तरण गरेको हो ।
विद्यालयलाई एक कार्यक्रमका बीच दीक्षान्त पुस्तक प्रकाशनका व्यवस्थापक महेश शर्मा र नम्रता अर्यात शर्माले पुस्तकहरू हस्तान्तरण गरेका हुन् । ‘सबल समाजको आधारः सार्वजनिक पुस्तकालय विकास र विस्तार’ भन्ने मूलनाराका साथ मनाइरहेको १४ औँ पुस्तकालय दिवसका अवसरमा आफूहरूले सार्वजनिक पुस्तकालाय समुदायस्तरमा पुगोस् भन्ने चाहेको दीक्षान्त प्रकाशनका व्यवस्थापक महेश शर्माले बताए ।
हस्तान्तरण कार्यक्रमको अध्यक्षता विद्यालय व्यवस्थापन समितिका अध्यक्ष ऋषि कुमार ढकालले गरेका थिए भने कार्यक्रममा विव्यस सदस्य तथा प्रधानाध्यापक तथा विद्यालयका शिक्षकहरूसमेत उपस्थित रहेका थिए ।
कार्यक्रममा बोल्दै विद्यालयका प्रधानाध्यापक अनिल रुपाखेतीले पुस्तकको महत्वमाथि प्रकाश पार्दै हस्तान्तरित सामग्रीले पुस्तकालय स्थापनामा सहयोग पुग्ने बताए । त्यस्तै विद्यालय व्यवस्थापन समितिका अध्यक्ष ढकालले सामाग्री वितरण गरेकोमा दीक्षान्त प्रकाशनलाई आभार व्यक्त गर्दै आगामी दिनमा समेत यस्तै सहयोगको अपेक्षा व्यक्त गरे ।
त्यस्तै, कार्यक्रममा बोल्दै दीक्षान्त पुस्तक प्रकाशनका व्यवस्थापक तथा कार्यक्रमका प्रमुख अतिथि महेश शर्माले सहयोग गर्न पाउँदा आफूलाई अत्यन्त खुसी लागेको र आगामी दिनमा यस्तै सहयोग गर्ने प्रतिबद्धता व्यक्त गरे ।
प्रकाशनले विद्यालयलाई १ लाख ६८ हजार बराबरको पुस्तक तथा शैक्षिक सामग्री वितरण गरेकाे दीक्षान्त पुस्तक प्रकाशनकी वितरक नम्रता अर्याल शर्माले बताइन् । हस्तान्तरित सामग्रीमा शब्दकोश, सामान्य ज्ञान, विभिन्न तहका पाठ्यपुस्तक, विभिन्न साहित्यिक कृतिहरू, शिक्षा तथा अन्य विभिन्न क्षेत्रका ऐन नियम तथा संविधान र विभिन्न स्टेसनरीहरू रहेको उनले बताइन् ।
