काठमाडौं । कोरोना भाइरस संक्रमणका कारण गण्डकी प्रदेशमा थप ४ जनाको मृत्यु भएको छ । प्रदेश स्वास्थ्य निर्देशनालयका अनुसार पोखरा महानगरपालिकाका ४२, ५८ र ६८ वर्षका पुरुष र ५२ वर्षकी महिलाको मृत्यु भएको छ ।
पोखरा महानगरपालिका– १ का ४२ वर्षका पुरुषको कात्तिक ७ गते साँझ ७ः४५ बजे चरक अस्पतालमा मृत्यु भएको छ । कात्तिक ३ गते कोरोना संक्रमण पुष्टि भएका उनी उपचारका लागि कात्तिक ७ गते नै अस्पताल भर्ना भएका थिए । उनमा निमोनियाको समस्या थियो ।
पोखरा महानगरपालिका–२२ का ६८ वर्षका पुरुषको कात्तिक ८ गते विहान साढे ९ बजे गण्डकी मेडिकल कलेजमा मृत्यु भएको छ । कात्तिक ६ गते कोरोना संक्रमण पुष्टि भएका उनी कात्तिक ७ गते अस्पताल भर्ना भएका थिए । उनमा पनि निमोनियाको समस्या थियो ।
पोखरा महानगरपालिका– ३१ का ५८ वर्षका पुरुषको कात्तिक ८ गते दिउँसो ४ स् २५ बजे पोखरा स्वास्थ्य विज्ञान प्रतिष्ठानमा मृत्यु भएको छ । कात्तिक ७ गते कोरोना संक्रमण पुष्टि भएका उनी सोही दिन अस्पताल भर्ना भएका थिए । उनमा निमानिया, हाइपरटेन्सन र मधुमेहको समस्या रहेको प्रदेश स्वास्थ्य निर्देशनालयका निर्देशक डा। विनोदविन्दु शर्माले जानकारी दिए ।
त्यस्तै पोखरा महानगरपालिका – १५ कि ५२ वर्षीया कोरोना संक्रमित महिलाको शनिबार राति पोखरा प्रतिष्ठानको सघन उपचार कक्षमा उपचारका क्रममा मृत्यु भएको छ । उनलाई शनिबार नै कोरोनाको संक्रमण पुष्टि भएपछि उपचारका लागि अस्पताल भर्ना गरिएको थियो ।
योसँगै कोरोना संक्रमणबाट गण्डकी प्रदेशमा मृत्यु हुनेको संख्या ६३ पुगेको छ ।